ಶ್ರೀ ರಙ್ಗನಾಥಸ್ತೋತ್ರಮ್

ಶ್ರೀ ರಙ್ಗನಾಥಸ್ತೋತ್ರಮ್

           (ಶ್ರೀ ಶಂಕರಾಚಾರ್ಯವಿರಚಿತಮ್)

ಸಪ್ತಪ್ರಾಕಾರಮಧ್ಯೇ ಸರಸಿಜಮುಕುಲೋದ್ಭಾಸಮಾನೇ ವಿಮಾನೇ

ಕಾವೇರೀಮಧ್ಯದೇಶೇ ಫಣಿಪತಿಶಯನೇ ಶೇಷಪರ್ಯಂಕಭಾಗೇ |

ನಿದ್ರಾಮುದ್ರಾಭಿರಾಮಂ ಕಟಿನಿಕಟಶಿರಃಪಾರ್ಶ್ವವಿನ್ಯಸ್ತಹಸ್ತಮ್

ಪದ್ಮಾಧಾತ್ರೀಕರಾಭ್ಯಾಂ ಪರಿಚಿತಚರಣಂ ರಙ್ಗರಾಜಂ ಭಜೇಽಹಮ್  || ೧ ||

ಆನನ್ದರೂಪೇ  ನಿಜಬೋಧರೂಪೇ

ಬ್ರಹ್ಮಸ್ವರೂಪೇ ಶ್ರುತಿಮೂರ್ತಿರೂಪೇ |

ಶಶಾಂಕರೂಪೇ ರಮಣೀಯರೂಪೇ

ಶ್ರೀರಙ್ಗರೂಪೇ ರಮತಾಂ ಮನೋ ಮೇ || ೨ ||

ಕಾವೇರಿತೀರೇ ಕರುಣಾವಿಲೋಲೇ

ಮನ್ದಾರಮೂಲೇ ಧೃತಚಾರುಚೇಲೇ |

ದೈತ್ಯಾನ್ತಕಾಲೇಽಖಿಲಲೋಕಲೀಲೇ  

ಶ್ರೀರಙ್ಗಲೀಲೇ ರಮತಾಂ ಮನೋ ಮೇ || ೩ ||

ಲಕ್ಷ್ಮೀನಿವಾಸೇ ಜಗತಾಂ ನಿವಾಸೇ

ಹೃತ್‌ಪದ್ಮವಾಸೇ ರವಿಬಿಮ್ಬವಾಸೇ |

ಕೃಪಾನಿವಾಸೇ ಗುಣಬೃನ್ದವಾಸೇ

ಶ್ರೀರಙ್ಗವಾಸೇ ರಮತಾಂ ಮನೋ ಮೇ || ೪ ||

ಬ್ರಹ್ಮಾದಿವನ್ದ್ಯೇ ಜಗದೇಕವನ್ದ್ಯೇ

ಮುಕುನ್ದವನ್ದ್ಯೇ ಸುರನಾಥವನ್ದ್ಯೇ |

ವ್ಯಾಸಾದಿವನ್ದ್ಯೇ ಸನಕಾದಿವನ್ದ್ಯೇ

ಶ್ರೀರಙ್ಗವನ್ದ್ಯೇ ರಮತಾಂ ಮನೋ ಮೇ || ೫ ||

ಬ್ರಹ್ಮಾಧಿರಾಜೇ ಗರುಡಾಧಿರಾಜೇ

ವೈಕುಣ್ಠರಾಜೇ ಸುರರಾಜರಾಜೇ |

ತ್ರೈಲೋಕ್ಯರಾಜೇಽಖಿಲಲೋಕರಾಜೇ

ಶ್ರೀರಙ್ಗರಾಜೇ ರಮತಾಂ ಮನೋ ಮೇ || ೬ ||

ಅಮೋಘಮುದ್ರೇ ಪರಿಪೂರ್ಣನಿದ್ರೇ

ಶ್ರೀಯೋಗನಿದ್ರೇ ಸಸಮುದ್ರನಿದ್ರೇ |

ಶ್ರಿತೈಕಭದ್ರೇ ಜಗದೇಕನಿದ್ರೇ

ಶ್ರೀರಙ್ಗಭದ್ರೇ ರಮತಾಂ ಮನೋ ಮೇ || ೭ ||

ಸ ಚಿತ್ರಶಾಯೀ ಭುಜಗೇನ್ದ್ರಶಾಯೀ

ನನ್ದಾಙ್ಕಶಾಯೀ ಕಮಲಾಙ್ಕಶಾಯೀ |

ಕ್ಷೀರಾಬ್ಧಿಶಾಯೀ ವಟಪತ್ರಶಾಯೀ

ಶ್ರೀರಙ್ಗಶಾಯೀ ರಮತಾಂ ಮನೋ ಮೇ || ೮ ||

ಇದಂ ಹಿ ರಙ್ಗಂ ತ್ಯಜತಾಮಿಹಾಙ್ಗಮ್

ಪುನರ್ನಚಾಙ್ಕಂ ಯದಿ ಚಾಙ್ಗಮೇತಿ |

ಪಾಣೌ ರಥಾಙ್ಗಂ ಚರಣೇಮ್ಬು ಗಾಙ್ಗಮ್

ಯಾನೇ ವಿಹಙ್ಗಂ ಶಯನೇ ಭುಜಙ್ಗಮ್ || ೯ ||

ರಙ್ಗನಾಥಾಷ್ಟಕಂ ಪುಣ್ಯಮ್

ಪ್ರಾತರುತ್ಥಾಯ ಯಃ ಪಠೇತ್ |

ಸರ್ವಾನ್ ಕಾಮಾನವಾಪ್ನೋತಿ

ರಙ್ಗಿಸಾಯುಜ್ಯಮಾಪ್ನುಯಾತ್ || ೧೦ ||