. ಶ್ರೀ ಸುದರ್ಶನಾಷ್ಟಕಮ್

. ಶ್ರೀ ಸುದರ್ಶನಾಷ್ಟಕಮ್

      (ಶ್ರೀ ವೇಙ್ಕಟನಾಯಕಪ್ರಣೀತಮ್)

ಪ್ರತಿಭಟಶ್ರೇಣಿಭೀಷಣ ವರಗುಣಸ್ತೋಮ ಭೂಷಣ

ಜನಿಭಯ ಸ್ಥಾನತಾರಣ ಜಗದವಸ್ಥಾನಕಾರಣ |       

ನಿಖಿಲದುಷ್ಕರ್ಮಕರ್ಶನ ನಿಗಮಸದ್ಧರ್ಮದರ್ಶನ

ಜಯ ಜಯ ಶ್ರೀಸುದರ್ಶನ ಜಯ ಜಯ ಶ್ರೀಸುದರ್ಶನ || ೧ ||

ಶುಭಜಗದ್ರೂಪಮಣ್ಡನ ಸುರಗಣತ್ರಾಸಖಣ್ಡನ

ಶತಮಖ ಬ್ರಹ್ಮವನ್ದಿತ ಶತಪಥಬ್ರಹ್ಮನನ್ದಿತ |

ಪ್ರಥಿತ ವಿದ್ವತ್-ಸಪಕ್ಷಿತ ಭವದಹಿರ್ಬುಧ್ನ್ಯಲಕ್ಷಿತ

ಜಯ ಜಯ ಶ್ರೀಸುದರ್ಶನ ಜಯ ಜಯ ಶ್ರೀಸುದರ್ಶನ || ೨ ||

ಸ್ಫುಟತಟಿಜ್ಜಾಲಪಿಞ್ಜರ ಪೃಥುತರಜ್ವಾಲಪಞ್ಜರ

ಪರಿಗತಪ್ರತ್ನವಿಗ್ರಹ ಪರಿಮಿತಪ್ರಜ್ಞದುರ್ಗ್ರಹ |

ಪ್ರಹರಣ ಗ್ರಾಮಮಣ್ಡಿತ ಪರಿಜನತ್ರಾಣ ಪಣ್ಡಿತ

ಜಯ ಜಯ ಶ್ರೀಸುದರ್ಶನ ಜಯ ಜಯ ಶ್ರೀಸುದರ್ಶನ || ೩ ||

ನಿಜಪದಪ್ರೋತ ಸದ್ಗಣ ನಿರುಪಧಿ ಸ್ಫೀತ ಷಡ್ಗುಣ

ನಿಗಮನಿರ್ವ್ಯೂಢವೈಭವ ನಿಜಪರವ್ಯೂಹವೈಭವ |

ಹರಿಹಯದ್ವೇಷಿ ದಾರಣ ಹರಪುರಪ್ಲೋಷಕಾರಣ

ಜಯ ಜಯ ಶ್ರೀಸುದರ್ಶನ ಜಯ ಜಯ ಶ್ರೀಸುದರ್ಶನ || ೪ ||

ದನುಜವಿಸ್ತಾರ ಕರ್ತನ ಜನಿತಮಿಸ್ರಾವಿಕರ್ತನ

ದನುಜವಿದ್ಯಾ ನಿಕರ್ತನ ಭಜದವಿದ್ಯಾ ನಿವರ್ತನ |

ಅಮರಹೃಷ್ಟಸ್ವವಿಕ್ರಮ ಸಮರಜುಷ್ಟಭ್ರಮಿಕ್ರಮ

ಜಯ ಜಯ ಶ್ರೀಸುದರ್ಶನ ಜಯ ಜಯ ಶ್ರೀಸುದರ್ಶನ || ೫ ||

ಪ್ರತಿಮುಖಾಲೀಢಬನ್ಧುರ ಪೃಥುಮಹಾಹೇತಿದನ್ತುರ

ವಿಕಟಮಾಯಾಬಹಿಷ್ಕೃತ ವಿವಿಧಮಾಲಾ ಪರಿಷ್ಕೃತ |

ಪೃಥುಮಹಾಯನ್ತ್ರ ತನ್ತ್ರಿತ ದೃಢದಯಾತನ್ತ್ರಯನ್ತ್ರಿತ

ಜಯ ಜಯ ಶ್ರೀಸುದರ್ಶನ ಜಯ ಜಯ ಶ್ರೀಸುದರ್ಶನ || ೬ ||

ಮಹಿತ ಸಂಪತ್-ಸದಕ್ಷರ ವಿಹಿತ ಸಂಪತ್-ಷಡಕ್ಷರ

ಷಡಾರಚಕ್ರಪ್ರತಿಷ್ಠಿತ ಸಕಲತತ್ವಪ್ರತಿಷ್ಠಿತ |

ವಿವಿಧಸಙ್ಕಲ್ಪಕಲ್ಪಕ ವಿಬುಧಸಙ್ಕಲ್ಪಕಲ್ಪಕ

ಜಯ ಜಯ ಶ್ರೀಸುದರ್ಶನ ಜಯ ಜಯ ಶ್ರೀಸುದರ್ಶನ || ೭ ||

ಭುವನನೇತಸ್ತ್ರಯೀಮಯ ಸವನ ತೇಜಸ್ತ್ರಯೀಮಯ

ನಿರವಧಿಸ್ವಾದುಚಿನ್ಮಯ ನಿಖಿಲಶಕ್ತೇ ಜಗನ್ಮಯ |

ಅಮಿತ ವಿಶ್ವಕ್ರಿಯಾಮಯ ಶಮಿತ ವಿಷ್ವಗ್-ಭಯಾಮಯ

ಜಯ ಜಯ ಶ್ರೀಸುದರ್ಶನ ಜಯ ಜಯ ಶ್ರೀಸುದರ್ಶನ || ೮ ||

ದ್ವಿಚತುಷ್ಕಮಿದಂ ಪ್ರಭೂತಸಾರಂ ಪಠತಾಂ ವೇಙ್ಕಟನಾಯಕಪ್ರಣೀತಮ್ |

ವಿಷಮೇಽಪಿ ಮನೋರಥಃ ಪ್ರಧಾವನ್ ನ ವಿಹನ್ಯೇತ ರಥಾಙ್ಗಧುರ್ಯಗುಪ್ತಃ || ೯ ||