ಶಿವರಕ್ಷಾಸ್ತೋತ್ರಮ್

ಶಿವರಕ್ಷಾಸ್ತೋತ್ರಮ್

          (ಯಾಜ್ಞವಲ್ಕ್ಯಕೃತಮ್)

 

ಚರಿತಂ ದೇವದೇವಸ್ಯ ಮಹಾದೇವಸ್ಯ ಪಾವನಮ್ |

ಅಪಾರಂ ಪರಮೋದಾರಂ ಚತುರ್ವರ್ಗಸ್ಯಸಾಧನಮ್ || ೧ ||

ಗೌರೀವಿನಾಯಕೋಪೇತಂ ಪಞ್ಚವಕ್ತ್ರಂ ತ್ರಿನೇತ್ರಕಮ್ |

ಶಿವಂ ಧ್ಯಾತ್ವಾ ದಶಭುಜಂ ಶಿವರಕ್ಷಾಂಪಠೇನ್ನರಃ || ೨ ||

ಗಂಗಾಧರಃ ಶಿರಃ ಪಾತು ಫಾಲಮರ್ಧೇನ್ದುಶೇಖರಃ |

ನಯನೇ ಮದನಧ್ವಂಸೀ ಕರ್ಣೌ ಸರ್ಪವಿಭೂಷಣಃ || ೩ ||

ಘ್ರಾಣಂ ಪಾತು ಪುರಾರಾತಿಃ ಮುಖಂ ಪಾತು ಜಗತ್ಪತಿಃ |

ಜಿಹ್ವಾಂ ವಾಗೀಶ್ವರಃ ಪಾತು ಕನ್ಧರಂ ಶಿತಿಕನ್ಧರಃ || ೪ ||

ಶ್ರೀಕಣ್ಠಃ ಪಾತು ಮೇ ಕಣ್ಠಂ ಸ್ಕನ್ಧೌ ವಿಶ್ವಧುರನ್ಧರಃ |

ಭುಜೌ ಭೂಭಾರಸಂಹರ್ತಾ ಕರೌ ಪಾತು ಪಿನಾಕಧೃಕ್ || ೫ ||

ಹೃದಯಂ ಶಂಕರಃ ಪಾತು ಜಠರಂ ಗಿರಿಜಾಪತಿಃ |

ನಾಭಿಂ ಮೃತ್ಯುಂಜಯಃ ಪಾತು ಕಟಿಂ ವ್ಯಾಘ್ರಾಜಿನಾಮ್ಬರಃ || ೬ ||

ಸಕ್ಥಿನೀ ಪಾತು ದೀನಾರ್ತಶರಣಾಗತವತ್ಸಲಃ |

ಊರೂ ಮಹೇಶ್ವರಃ ಪಾತು ಜಾನುನೀ ಜಗದೀಶ್ವರಃ || ೭ ||

ಜಙ್ಘೇ ಪಾತು ಜಗತ್ಕರ್ತಾ ಗುಲ್ಫೌ ಪಾತು ಗಣಾಧಿಪಃ |

ಚರಣೌ ಕರುಣಾಸಿನ್ಧುಃ ಸರ್ವಾಂಗಾನಿ ಸದಾಶಿವಃ || ೮ ||

ಏತಾಂ ಶಿವಬಲೋಪೇತಾಂ ರಕ್ಷಾಂ ಯಃ ಸುಕೃತೀ ಪಠೇತ್ |

ಸ ಭುಕ್ತ್ವಾ ಸಕಲಾನ್ ಕಾಮಾನ್ ಶಿವಸಾಯೂಜ್ಯಮಾಪ್ನುಯಾತ್ || ೯ ||

ಗ್ರಹಭೂತಪಿಶಾಚಾದ್ಯಾಃ ತ್ರೈಲೋಕ್ಯೇ ವಿಚರನ್ತಿ ಯೇ |

ದೂರಾದಾಶು ಪಲಾಯನ್ತೇ ಶಿವನಾಮಾಭಿರಕ್ಷಣಾತ್ || ೧೦ ||

ಅಭಯಙ್ಕರನಾಮೇದಂ ಕವಚಂ ಪಾರ್ವತೀಪತೇಃ |

ಭಕ್ತ್ಯಾ ಬಿಭರ್ತಿ ಯಃ ಕಣ್ಠೇ ತಸ್ಯ ವಶ್ಯಂ ಜಗತ್ತ್ರಯಮ್ || ೧೧ ||