ಶ್ರೀಹನುಮತ್ಸ್ತೋತ್ರಮ್

ಶ್ರೀಹನುಮತ್ಸ್ತೋತ್ರಮ್

ಅಕ್ಷಾದಿರಾಕ್ಷಸಹರಂ ದಶಕಣ್ಠದರ್ಪ-

ನಿರ್ಮೂಲನಂ ರಘುವರಾಙ್ಘ್ರಿಸರೋಜಭಕ್ತಮ್ |

ಸೀತಾವಿಷಹ್ಯದುಃಖನಿವಾರಕಂ ತಂ

ವಾಯೋಃ ಸುತಂ ಗಿಲಿತಭಾನುಮಹಂ ನಮಾಮಿ || ೧ ||

ಮಾಂ ಪಶ್ಯ ಪಶ್ಯ ಹನುಮನ್ ನಿಜದೃಷ್ಟಿಪಾತೈಃ

ಮಾಂ ರಕ್ಷ ರಕ್ಷ ಪರಿತೋ ರಿಪುದುಃಖವರ್ಗಾತ್ |

ವಶ್ಯಾಂ ಕುರು ತ್ರಿಜಗತೀಂ ವಸುಧಾಧಿಪಾನಾಂ

ಮೇ ದೇಹಿ ದೇಹಿ ಮಹತೀಂ ವಸುಧಾಂ ಶ್ರಿಯಂ ಚ || ೨ ||

ಆಪದ್ಭ್ಯೋ ರಕ್ಷ ಸರ್ವತ್ರ ಆಞ್ಜನೇಯ ನಮೋಽಸ್ತು ತೇ |

ಬನ್ಧನಂ ಛಿನ್ಧಿ ಮೇ ನಿತ್ಯಂ ಕಪಿವೀರ ನಮೋಽಸ್ತು ತೇ || ೩ ||

ದುಷ್ಟರೋಗಾನ್ ಹನ ಹನ ರಾಮದೂತ ನಮೋಽಸ್ತು ತೇ |

ಉಚ್ಚಾಟಯ ರಿಪೂನ್ ಸರ್ವಾನ್ ಮೋಹನಂ ಕುರು ಭೂಭುಜಾಮ್ || ೪ ||

ವಿದ್ವೇಷಿಣೋ ಮಾರಯ ತ್ವಂ ತ್ರಿಮೂರ್ತ್ಯಾತ್ಮಕ ಸರ್ವದಾ |

ಸಞ್ಜೀವಪರ್ವತೋದ್ಧಾರ ಮನೋದುಃಖಂ ನಿವಾರಯ || ೫ ||

ಘೋರಾನುಪದ್ರವಾನ್ ಸರ್ವಾನ್ ನಾಶಯಾಕ್ಷಾಸುರಾನ್ತಕ |

ಏವಂ ಸ್ತುತ್ವಾ ಹನೂಮನ್ತಂ ನರಃ ಶ್ರದ್ಧಾಸಮನ್ವಿತಃ || ೬ ||

ಪುತ್ರಪೌತ್ರಾದಿಸಹಿತಃ ಸರ್ವಸೌಖ್ಯಮವಾಪ್ನುಯಾತ್ | ೭ |