ಪ್ರದೋಷಸ್ತೋತ್ರಮ್

ಪ್ರದೋಷಸ್ತೋತ್ರಮ್

    (ಸ್ಕಾನ್ದಪುರಾಣಾನ್ತರ್ಗತಮ್)

ಸತ್ಯಂ ಬ್ರವೀಮಿ ಪರಲೋಕಹಿತಂ ಬ್ರವೀಮಿ

ಸಾರಂ ಬ್ರವೀಮ್ಯುಪನಿಷದ್ಧೃದಯಂ ಬ್ರವೀಮಿ |

ಸಂಸಾರಮುಲ್ಬಣಮಸಾರಮವಾಪ್ಯ ಜನ್ತೋಃ

ಸಾರೋಽಯಮೀಶ್ವರಪದಾಮ್ಬುರುಹಸ್ಯ ಸೇವಾ || ೧ ||

ಯೇ ನಾರ್ಚಯನ್ತಿ ಗಿರಿಶಂ ಸಮಯೇ ಪ್ರದೋಷೇ

ಯೇ ನಾರ್ಚಿತಂ ಶಿವಮಪಿ ಪ್ರಣಮನ್ತಿ ಚಾನ್ಯೇ |

ಯೇ ತತ್ಕಥಾಂ ಶ್ರುತಿಪುಟೈಃ ನ ಪಿಬನ್ತಿ ಮೂಢಾಃ

ತೇ ಜನ್ಮಜನ್ಮಸು ಭವನ್ತಿ ನರಾಃ ದರಿದ್ರಾಃ || ೨ ||

ಯೇ ವೈ ಪ್ರದೋಷಸಮಯೇ ಪರಮೇಶ್ವರಸ್ಯ

ಕುರ್ವನ್ತ್ಯನನ್ಯಮನಸೋಽಙ್ಘ್ರಿಸರೋಜಪೂಜಾಮ್ |

ನಿತ್ಯಂ ಪ್ರವೃದ್ಧಧನಧಾನ್ಯಕಲತ್ರಪುತ್ರ-

ಸೌಭಾಗ್ಯಸಂಪದಧಿಕಾಸ್ತ ಇಹೈವ ಲೋಕೇ || ೩ ||

ಕೈಲಾಸಶೈಲಭವನೇ ತ್ರಿಜಗಜ್ಜನಿತ್ರೀಮ್

ಗೌರೀಂ ನಿವೇಶ್ಯ ಕನಕಾಞ್ಚಿತರತ್ನಪೀಠೇ |

ನೃತ್ಯಂ ವಿಧಾತುಮಭಿವಾಞ್ಛತಿ ಶೂಲಪಾಣೌ

ದೇವಾಃ ಪ್ರದೋಷ ಸಮಯೇ ನು ಭಜನ್ತಿ ಸರ್ವೇ || ೪ ||

ವಾಗ್ದೇವೀ ಧೃತವಲ್ಲಕೀ ಶತಮಖೋ ವೇಣುಂ ದಧತ್ ಪದ್ಮಜಃ

ತಾಲೋನ್ನಿದ್ರಕರಾ ರಮಾ ಭಗವತೀ ಗೇಯಪ್ರಯೋಗಾನ್ವಿತಾ |

ವಿಷ್ಣುಃ ಸಾನ್ದ್ರಮೃದಙ್ಗವಾದನಪಟುಃ ದೇವಾಃ ಸಮನ್ತಾತ್ ಸ್ಥಿತಾಃ

ಸೇವನ್ತೇ ತಮನು ಪ್ರದೋಷಸಮಯೇ ದೇವಂ ಮೃಡಾನೀಪತಿಮ್ || ೫ ||

ಗನ್ಧರ್ವಯಕ್ಷಪತಗೋರಗಸಿದ್ಧಸಾಧ್ಯ-

ವಿದ್ಯಾಧರಾಮರವರಾಪ್ಸರಸಾಂ ಗಣಾಶ್ಚ |

ಯೇಽನ್ಯೇ ತ್ರಿಲೋಕನಿಲಯಾಃ ಸಹಭೂತವರ್ಗಾಃ

ಪ್ರಾಪ್ತೇ ಪ್ರದೋಷಸಮಯೇ ಹರಪಾರ್ಶ್ವಸಂಸ್ಥಾಃ || ೬ ||

ಅತಃ ಪ್ರದೋಷೇ ಶಿವ ಏಕ ಏವ

ಪೂಜ್ಯೋಽಥ ನಾನ್ಯೇ ಹರಿಪದ್ಮಜಾದ್ಯಾಃ |

ತಸ್ಮಿನ್ ಮಹೇಶೇ ವಿಧಿನೇಜ್ಯಮಾನೇ

ಸರ್ವೇ ಪ್ರಸೀದನ್ತಿ ಸುರಾಧಿನಾಥಾಃ || ೭ ||