ಶ್ರೀನರಸಿಂಹಾಷ್ಟಕಮ್

. ಶ್ರೀನರಸಿಂಹಾಷ್ಟಕಮ್

ಶ್ರೀಮದಕಲಙ್ಕ ಪರಿಪೂರ್ಣ ಶಶಿಕೋಟಿ

ಶ್ರೀಧರ ಮನೋಹರ ಸಟಾಪಟಲಕಾನ್ತ |

ಪಾಲಯ ಕೃಪಾಲಯ ಭವಾಮ್ಬು ನಿಮಗ್ನಮ್

ದೈತ್ಯವರಕಾಲ ನರಸಿಂಹ ನರಸಿಂಹ || ೧ ||

ಪದಕಮಲಾವನತ-ಪಾತಕಿಜನಾನಾಮ್

ಪಾತಕ ದವಾನಲ ಪತತ್ರಿ ವರಕೇತೋ |

ಭಾವನ ಪರಾಯಣ ಭವಾರ್ತಿಹರಯಾ ಮಾಮ್

ಪಾಹಿ ಕೃಪಯೈವ ನರಸಿಂಹ ನರಸಿಂಹ || ೨ ||

ತುಙ್ಗನಖಪಙ್ಕ್ತಿ ದಲಿತಾಸುರವರಾಸೃಕ್-

ಪಙ್ಕನವ ಕುಙ್ಕುಮ ವಿಪಙ್ಕಿಲ ಮಹೋರಃ |

ಪಣ್ಡಿತ ನಿಧಾನ ಕಮಲಾಲಯ ನಮಸ್ತೇ

ಪಙ್ಕಜ ನಿಷಣ್ಣ ನರಸಿಂಹ ನರಸಿಂಹ || ೩ ||

ಮೌಲಿಷು ವಿಭೂಷಣಮಿವಾಮರವರಾಣಾಮ್

ಯೋಗಿ ಹೃದಯೇಷು ಚ ಶಿರಸ್ಸು ನಿಗಮಾನಾಮ್ |

ರಾಜದರವಿನ್ದ ರುಚಿರಂ ಪದಯುಗಂ ತೇ

ಧೇಹಿ ಮಮ ಮೂರ್ಧ್ನಿ ನರಸಿಂಹ ನರಸಿಂಹ || ೪ ||

ವಾರಿಜವಿಲೋಚನ ಮದನ್ತಿಮ ದಶಾಯಾಮ್

ಕ್ಲೇಶವಿವಶೀಕೃತ ಸಮಸ್ತಕರಣಾಯಾಮ್ |

ಏಹಿ ರಮಯಾಸಹ ಶರಣ್ಯ ವಿಹಗಾನಾಮ್

ನಾಥಮಧಿರುಹ್ಯ ನರಸಿಂಹ ನರಸಿಂಹ || ೫ ||

ಹಾಟಕ ಕಿರೀಟ ವರಹಾರ ವನಮಾಲಾ

ತಾರರಶನಾ ಮಕರ ಕುಣ್ಡಲ ಮಣೀನ್ದ್ರೈಃ |

ಭೂಷಿತಮಶೇಷನಿಲಯಂ ತವ ವಪುರ್ಮೇ

ಚೇತಸಿ ಚಕಾಸ್ತು ನರಸಿಂಹ ನರಸಿಂಹ || ೬ ||

ಇನ್ದುರವಿ ಪಾವಕ ವಿಲೋಚನ ರಮಾಯಾ-

ಮನ್ದಿರ ಮಹಾಭುಜ ಲಸದ್ವರ ರಥಾಙ್ಗ |

ಸುನ್ದರ ಚಿರಾಯ ರಮತಾಂ ತ್ವಯಿ ಮನೋ

ನನ್ದಿತ ಸುರೇಶ ನರಸಿಂಹ ನರಸಿಂಹ || ೭ ||

ಮಾಧವ ಮುಕುನ್ದ ಮಧುಸೂದನ ಮುರಾರೇ

ವಾಮನ ನೃಸಿಂಹ ಶರಣಂ ಭವ ನತಾನಾಮ್ |

ಕಾಮದ ಘೃಣಿನ್ ನಿಖಿಲಕಾರಣ ನಯೇಯಮ್

ಕಾಲಮಮರೇಶ ನರಸಿಂಹ ನರಸಿಂಹ || ೮ ||

ಅಷ್ಟಕಮಿದಂ ಸಕಲ ಪಾತಕಭಯಘ್ನಮ್

ಕಾಮದಮಶೇಷದುರಿತಾಮಯರಿಪುಘ್ನಮ್ |

ಯಃ ಪಠತಿ ಸನ್ತತಮಶೇಷನಿಲಯಂ ತೇ

ಗಚ್ಛತಿ ಪದಂ ಸ ನರಸಿಂಹ ನರಸಿಂಹ || ೯ ||

           ***