ಶಿವತಾಣ್ಡವಸ್ತೋತ್ರಮ್

ಶಿವತಾಣ್ಡವಸ್ತೋತ್ರಮ್

            (ರಾವಣಕೃತಂ)

ಜಟಾಟವೀಗಲಜ್ಜಲಪ್ರವಾಹಪಾವಿತಸ್ಥಲೇ

ಗಲೇಽವಲಮ್ಬ್ಯ ಲಮ್ಬಿತಾಂ ಭುಜಙ್ಗತುಙ್ಗಮಾಲಿಕಾಮ್ |

ಡಮಡ್ಡಮಡ್ಡಮಡ್ಡಮನ್ನಿನಾದವಡ್ಡಮರ್ವಯಂ

ಚಕಾರ ಚಣ್ಡತಾಣ್ಡವಂ ತನೋತು ನಃ ಶಿವಃ ಶಿವಮ್ || ೧ ||

ಜಟಾಕಟಾಹಸಂಭ್ರಮಭ್ರಮನ್ನಿಲಿಂಪನಿರ್ಝರೀ-

ವಿಲೋಲವೀಚಿವಲ್ಲರೀವಿರಾಜಮಾನಮೂರ್ಧನಿ |

ಧಗದ್ಧಗದ್ಧಗಜ್ಜ್ವಲಲ್ಲಲಾಟಪಟ್ಟಪಾವಕೇ

ಕಿಶೋರಚನ್ದ್ರಶೇಖರೇ ರತಿಃ ಪ್ರತಿಕ್ಷಣಂ ಮಮ || ೨ ||

ಧರಾಧರೇನ್ದ್ರನನ್ದಿನೀ ವಿಲಾಸಬನ್ಧುಬನ್ಧುರ-

ಸ್ಫುರದ್ದಿಗನ್ತಸನ್ತತಿ ಪ್ರಮೋದಮಾನಮಾನಸೇ |

ಕೃಪಾಕಟಾಕ್ಷಧೋರಣೀ ನಿರುದ್ಧ ದುರ್ಧರಾಪದಿ

ಕ್ವಚಿದ್ದಿಗಂಬರೇ ಮನೋ ವಿನೋದಮೇತು ವಸ್ತುನಿ || ೩ ||

ಜಟಾಭುಜಙ್ಗಪಿಙ್ಗಲಸ್ಫುರತ್‌ಫಣಾಮಣಿಪ್ರಭಾ-

ಕದಂಬಕುಙ್ಕುಮದ್ರವ ಪ್ರಲಿಪ್ತ ದಿಗ್ವಧೂಮುಖೇ |

ಮದಾನ್ಧಸಿನ್ಧುರಸ್ಫುರತ್‌ತ್ವಗುತ್ತರೀಯ ಮೇದುರೇ

ಮನೋ ವಿನೋದಮದ್ಭುತಂ ಬಿಭರ್ತು ಭೂತಭರ್ತರಿ || ೪ ||

ಸಹಸ್ರಲೋಚನಪ್ರಭೃತ್ಯಶೇಷಲೇಖಶೇಖರ-

ಪ್ರಸೂನಧೂಲಿಧೋರಣೀವಿಧೂಸರಾಙ್ಘ್ರಿಪೀಠಭೂಃ |

ಭುಜಙ್ಗರಾಜಮಾಲಯಾ ನಿಬದ್ಧಜಾಟಜೂಟಕಃ

ಶ್ರಿಯೈ ಚಿರಾಯ ಜಾಯತಾಂ ಚಕೋರಬನ್ಧುಶೇಖರಃ || ೫ ||

ಲಲಾಟಚತ್ವರಜ್ವಲದ್ಧನನ್ಜಯಸ್ಫುಲಿಙ್ಗಭಾ-

ನಿಪೀತಪಞ್ಚಸಾಯಕಮ್ ನಮನ್ನಿಲಿಂಪನಾಯಕಮ್ |

ಸುಧಾಮಯೂಖಲೇಖಯಾ ವಿರಾಜಮಾನಶೇಖರಮ್

ಮಹಾಕಪಾಲಿಸಂಪದೇ ಶಿರೋ ಜಟಾಲಮಸ್ತು ನಃ || ೬ ||

ಕರಾಲಭಾಲಪಟ್ಟಿಕಾ ಧಗದ್ಧಗದ್ಧಗಜ್ಜ್ವಲ-

ದ್ಧನನ್ಜಯಾಹುತೀಕೃತ ಪ್ರಚಣ್ಡ ಪಞ್ಚಸಾಯಕೇ |

ಧರಾಧರೇನ್ದ್ರನನ್ದಿನೀ ಕುಚಾಗ್ರಚಿತ್ರಪತ್ರಕ-

ಪ್ರಕಲ್ಪನೈಕಶಿಲ್ಪಿನಿ ತ್ರಿಲೋಚನೇ ರತಿರ್ಮಮ || ೭ ||

ನವೀನಮೇಘಮಣ್ಡಲೀನಿರುದ್ಧದುರ್ಧರಸ್ಫುರ-

ತ್ಕುಹೂನಿಶೀಥಿನೀತಮಃ ಪ್ರಬನ್ಧಬದ್ಧಕನ್ಧರಃ |

ನಿಲಿಂಪನಿರ್ಝರೀಧರಸ್ತನೋತು ಕೃತ್ತಿಸಿನ್ಧುರಃ

ಕಲಾನಿಧಾನಬನ್ಧುರಃ ಶ್ರಿಯಂ ಜಗದ್ಧುರನ್ಧರಃ || ೮ ||

ಪ್ರಫುಲ್ಲನೀಲಪಙ್ಕಜಪ್ರಪಞ್ಚಕಾಲಿಮಪ್ರಭಾ-

ವಲಮ್ಬಿಕಣ್ಠಕನ್ದಲೀರುಚಿಪ್ರಬದ್ಧಕನ್ಧರಮ್ |

ಸ್ಮರಚ್ಛಿದಂ ಪುರಚ್ಛಿದಂ ಭವಚ್ಛಿದಂ ಮಖಚ್ಛಿದಂ

ಗಜಚ್ಛಿದಾನ್ಧಕಚ್ಛಿದಂ ತಮನ್ತಕಚ್ಛಿದಂ ಭಜೇ || ೯ ||

ಅಖರ್ವ ಸರ್ವಮಙ್ಗಲಾ ಕಲಾಕದಂಬಮನ್ಜರೀ-

ರಸಪ್ರವಾಹಮಾಧುರೀ ವಿಜೃಂಭಣಾಮಧುವ್ರತಮ್ |

ಸ್ಮರಾನ್ತಕಂ ಪುರಾನ್ತಕಂ ಭವಾನ್ತಕಂ ಮಖಾನ್ತಕಂ

ಗಜಾನ್ತಕಾನ್ಧಕಾನ್ತಕಂ ತಮನ್ತಕಾನ್ತಕಂ ಭಜೇ || ೧೦ ||

ಜಯತ್ವದಭ್ರವಿಭ್ರಮಭ್ರಮದ್ಭುಜಙ್ಗಮಶ್ವಸ-

ದ್ವಿನಿರ್ಗಮತ್‌ಕ್ರಮಸ್ಫುರತ್‌ಕರಾಲಭಾಲಹವ್ಯವಾಟ್ |

ಧಿಮಿದ್ಧಿಮಿದ್ಧಿಮಿದ್ಧ್ವನನ್ಮೃದಙ್ಗತುಙ್ಗಮಙ್ಗಲ-

ಧ್ವನಿಕ್ರಮಪ್ರವರ್ತಿತಪ್ರಚಣ್ಡತಾಣ್ಡವಃ ಶಿವಃ || ೧೧ ||

ದೃಷದ್ವಿಚಿತ್ರತಲ್ಪಯೋರ್ಭುಜಙ್ಗಮೌಕ್ತಿಕಸ್ರಜೋ-

ರ್ಗರಿಷ್ಠರತ್ನಲೋಷ್ಠಯೋಃ ಸುಹೃದ್ವಿಪಕ್ಷಪಕ್ಷಯೋಃ |

ತೃಣಾರವಿನ್ದಚಕ್ಷುಷೋಃ ಪ್ರಜಾಮಹೀಮಹೇನ್ದ್ರಯೋಃ

ಸಮಪ್ರವೃತ್ತಿಕಃ ಕದಾ ಸದಾಶಿವಂ ಭಜಾಮ್ಯಹಮ್ || ೧೨ ||

ಕದಾನಿಲಿಂಪನಿರ್ಝರೀ ನಿಕುಞ್ಜಕೋಟರೇ ವಸನ್

ವಿಮುಕ್ತದುರ್ಮತಿಃ ಸದಾ ಶಿರಃಸ್ಥಮಂಜಲಿಂ ವಹನ್ |

ವಿಲೋಲಲೋಲಲೋಚನೋ ಲಲಾಮಭಾಲಲಗ್ನಕಃ

ಶಿವೇತಿ ಮನ್ತ್ರಮುಚ್ಚರನ್ ಕದಾ ಸುಖೀ ಭವಾಮ್ಯಹಮ್ || ೧೩ ||

ಇಮಂ ಹಿ ನಿತ್ಯಮೇವಮುಕ್ತಮುತ್ತಮೋತ್ತಮಂ ಸ್ತವಂ

ಪಠನ್‌ಸ್ಮರನ್‌ಬ್ರುವನ್ನರೋ ವಿಶುದ್ಧಿಮೇತಿ ಸನ್ತತಮ್ |

ಹರೇ ಗುರೌ ಸುಭಕ್ತಿಮಾಶು ಯಾತಿ ನಾನ್ಯಥಾಗತಿಮ್

ವಿಮೋಹನಂ ಹಿ ದೇಹಿನಾಂ ಸುಶಂಕರಸ್ಯ ಚಿನ್ತನಮ್ || ೧೪ ||

ಪೂಜಾವಸಾನಸಮಯೇ ದಶವಕ್ತ್ರಗೀತಮ್

ಯಃ ಶಂಭುಪೂಜನಪರಂ ಪಠತಿ ಪ್ರದೋಷೇ |

ತಸ್ಯಸ್ಥಿರಾಂ ರಥಗಜೇನ್ದ್ರತುರಙ್ಗಯುಕ್ತಾಂ

ಲಕ್ಷ್ಮೀಂ ಸದೈವ ಸುಮುಖೀಂ ಪ್ರದದಾತಿ ಶಂಭುಃ || ೧೫ ||