ಶ್ರೀ ಆಞ್ಜನೇಯಸ್ತೋತ್ರಮ್

 ಶ್ರೀ ಆಞ್ಜನೇಯಸ್ತೋತ್ರಮ್

       (ಉಮಾಮಹೇಶ್ವರಸಂವಾದಾತ್ಮಕಮ್)

ಶೃಣು ದೇವಿ ಪ್ರವಕ್ಷ್ಯಾಮಿ ಸ್ತೋತ್ರಂ ಸರ್ವಭಯಾಪಹಮ್ |

ಸರ್ವಕಾಮಪ್ರದಂ ನೄಣಾಂ ಹನೂಮತ್ಸ್ತೋತ್ರಮುತ್ತಮಮ್ || ೧ ||

ತಪ್ತಕಾಞ್ಚನಸಂಕಾಶಂ ನಾನಾರತ್ನವಿಭೂಷಿತಮ್ |

ಉದ್ಯತ್ಬಾಲಾರ್ಕವದನಂ ತ್ರಿನೇತ್ರಂ ಕುಣ್ಡಲೋಜ್ಜ್ವಲಮ್ || ೨ ||

ಮೌಞ್ಜೀಕೌಪೀನಸಂಯುಕ್ತಂ ಹೇಮಯಜ್ಞೋಪವೀತಿನಮ್ |

ಪಿಙ್ಗಲಾಕ್ಷಂ ಮಹಾಕಾಯಂ ಟಙ್ಕಶೈಲೇನ್ದ್ರಧಾರಿಣಮ್ || ೩ ||

ಶಿಖಾನಿಕ್ಷಿಪ್ತವಾಲಾಗ್ರಂ ಮೇರುಶೈಲಾಗ್ರಸಂಸ್ಥಿತಮ್ |

ಮೂರ್ತಿತ್ರಯಾತ್ಮಕಂ ಪೀನಂ ಮಹಾವೀರಂ ಮಹಾಹನುಮ್ || ೪ ||

ಹನುಮನ್ತಂ ವಾಯುಪುತ್ರಂ ನಮಾಮಿ ಬ್ರಹ್ಮಚಾರಿಣಮ್ |

ತ್ರಿಮೂರ್ತ್ಯಾತ್ಮಕಮಾತ್ಮಸ್ಥಂ ಜಪಾಕುಸುಮಸನ್ನಿಭಮ್ || ೫ ||

ನಾನಾಭೂಷಣಸಂಯುಕ್ತಂ ಆಞ್ಜನೇಯಂ ನಮಾಮ್ಯಹಮ್ |

ಪಞ್ಚಾಕ್ಷರಸ್ಥಿತಂ ದೇವಂ ನೀಲನೀರದಸನ್ನಿಭಮ್ || ೬ ||

ಪೂಜಿತಂ ಸರ್ವದೇವೈಶ್ಚ ರಾಕ್ಷಸಾನ್ತಂ ನಮಾಮ್ಯಹಮ್ |

ಅಚಲದ್ಯುತಿಸಙ್ಕಾಶಂ ಸರ್ವಾಲಙ್ಕಾರಭೂಷಿತಮ್ || ೭ ||

ಷಡಕ್ಷರಸ್ಥಿತಂ ದೇವಂ ನಮಾಮಿ ಕಪಿನಾಯಕಮ್ |

ತಪ್ತಸ್ವರ್ಣಮಯಂ ದೇವಂ ಹರಿದ್ರಾಭಂ ಸುರಾರ್ಚಿತಮ್ || ೮ ||

ಸುನ್ದರಾಂಸಾಬ್ಜನಯನಂ ತ್ರಿನೇತ್ರಂ ತಂ ನಮಾಮ್ಯಹಮ್ |

ಅಷ್ಟಾಕ್ಷರಾಧಿಪಂ ದೇವಂ ಹೀರವರ್ಣಸಮುಜ್ಜ್ವಲಮ್ || ೯ ||

ನಮಾಮಿ ಜನತಾವನ್ದ್ಯಂ ಲಙ್ಕಾಪ್ರಾಸಾದಭಞ್ಜನಮ್ |

ಅತಸೀಪುಷ್ಪಸಙ್ಕಾಶಂ ದಶವರ್ಣಾತ್ಮಕಂ ವಿಭುಮ್ || ೧೦ ||

ಜಟಾಧರಂ ಚತುರ್ಬಾಹುಂ ನಮಾಮಿ ಕಪಿನಾಯಕಮ್ |

ದ್ವಾದಶಾಕ್ಷರಮನ್ತ್ರಸ್ಯ ನಾಯಕಂ ಕುನ್ತಧಾರಿಣಮ್ || ೧೧ ||

ಅಙ್ಕುಶಂ ಚ ದಧಾನಂ ತಂ ಕಪಿವೀರಂ ನಮಾಮ್ಯಹಮ್ |

ತ್ರಯೋದಶಾಕ್ಷರಯುತಂ ಸೀತಾದುಃಖನಿವಾರಣಮ್ || ೧೨ ||

ಪೀತವರ್ಣಂ ಲಸತ್ಕಾಯಂ ಭಜೇ ಸುಗ್ರೀವಮನ್ತ್ರಿಣಮ್ |

ಮಾಲಾಮನ್ತ್ರಾತ್ಮಕಂ ದೇವಂ ಚಿತ್ರವರ್ಣಂ ಚತುರ್ಭುಜಮ್ || ೧೩ ||

ಪಾಶಾಙ್ಕುಶಾಭಯಕರಂ ಧೃತಟಙ್ಕಂ ನಮಾಮ್ಯಹಮ್ |

ಸುರಾಸುರಗಣೈಃ ಸರ್ವೈಃ ಸಂಸ್ತುತಂ ಪ್ರಣಮಾಮ್ಯಹಮ್ || ೧೪ ||

ಏವಂ ಧ್ಯಾಯನ್ನರೋ ನಿತ್ಯಂ ಸರ್ವಪಾಪೈಃ ಪ್ರಮುಚ್ಯತೇ |

ಪ್ರಾಪ್ನೋತಿ ಚಿನ್ತಿತಂ ಕಾರ್ಯಂ ಶೀಘ್ರಮೇವ ನ ಸಂಶಯಃ || ೧೫ ||