ಶಿವಾಷ್ಟಕಮ್ (ವರುಣಕೃತಮ್)

. ಶಿವಾಷ್ಟಕಮ್ (ವರುಣಕೃತಮ್)

ಕಲ್ಯಾಣಶೈಲಪರಿಕಲ್ಪಿತಕಾರ್ಮುಕಾಯ

ಮೌರ್ವೀಕೃತಾಖಿಲಮಹೋರಗನಾಯಕಾಯ |

ಪೃಥ್ವೀರಥಾಯ ಕಮಲಾಪತಿಸಾಯಕಾಯ

ಹಾಲಾಸ್ಯಮಧ್ಯನಿಲಯಾಯ ನಮಃ ಶಿವಾಯ  || ೧ ||

ಭಕ್ತಾರ್ತಿಭಞ್ಜನಪರಾಯ ಪರಾತ್ಪರಾಯ

ಕಾಲಾಭ್ರಕಾನ್ತಿಗರಲಾಙ್ಕಿತಕನ್ಧರಾಯ |

ಭೂತೇಶ್ವರಾಯಭುವನತ್ರಯಕಾರಣಾಯ

ಹಾಲಾಸ್ಯಮಧ್ಯನಿಲಯಾಯ ನಮಃ ಶಿವಾಯ || ೨ ||

ಭೂದಾರಮೂರ್ತಿಪರಿಮೃಗ್ಯಪದಾಂಬುಜಾಯ

ಹಂಸಾಬ್ಜಸಂಭವಸುದೂರಸುಮಸ್ತಕಾಯ |

ಜ್ಯೋತಿರ್ಮಯಸ್ಫುರಿತದಿವ್ಯವಪುರ್ಧರಾಯ

ಹಾಲಾಸ್ಯಮಧ್ಯನಿಲಯಾಯ ನಮಃ ಶಿವಾಯ || ೩ ||

ಕಾದಂಬಕಾನನ ನಿವಾಸ ಕುತೂಹಲಾಯ

ಕಾನ್ತಾರ್ಧಭಾಗ ಕಮನೀಯಕಲೇಬರಾಯ |

ಕಾಲಾನ್ತಕಾಯ ಕರುಣಾಮೃತಸಾಗರಾಯ

ಹಾಲಾಸ್ಯಮಧ್ಯನಿಲಯಾಯ ನಮಃ ಶಿವಾಯ || ೪ ||

 ವಿಶ್ವೇಶ್ವರಾಯ ವಿಬುಧೇಶ್ವರಪೂಜಿತಾಯ

ವಿದ್ಯಾವಿಶಿಷ್ಟ ವಿದಿತಾತ್ಮ ಸುವೈಭವಾಯ |

ವಿದ್ಯಾಪ್ರದಾಯ ವಿಮಲೇನ್ದ್ರವಿಮಾನಗಾಯ

ಹಾಲಾಸ್ಯಮಧ್ಯನಿಲಯಾಯ ನಮಃ ಶಿವಾಯ || ೫ ||

ಸಂಪತ್ಪ್ರದಾಯ ಸಕಲಾಗಮಮಸ್ತಕೇಷು

ಸಂಘೋಷಿತಾತ್ಮವಿಭವಾಯ ಸದಾಶಿವಾಯ |

ಸರ್ವಾತ್ಮನೇ ಸಕಲದುಃಖಸಮೂಲಹನ್ತ್ರೇ

ಹಾಲಾಸ್ಯಮಧ್ಯನಿಲಯಾಯ ನಮಃ ಶಿವಾಯ || ೬ ||

ಗಙ್ಗಾಧರಾಯ ಗರುಡಧ್ವಜವನ್ದಿತಾಯ

ಗಣ್ಡಸ್ಫುರತ್ಭುಜಗಕುಣ್ಡಲಮಣ್ಡಿತಾಯ |

ಗನ್ಧರ್ವಕಿನ್ನರಸುಗೀತ ಗುಣಾತ್ಮಕಾಯ

ಹಾಲಾಸ್ಯಮಧ್ಯನಿಲಯಾಯ ನಮಃ ಶಿವಾಯ || ೭ ||

ಪಾಣಿಂ ಪ್ರಗೃಹ್ಯ ಮಲಯಧ್ವಜ ಭೂಪಪುತ್ರ್ಯಾಃ

ಪಾಣ್ಡ್ಯೇಶ್ವರಃ ಸ್ವಯಮಭೂತ್ ಪರಮೇಶ್ವರೋ ಯಃ |

ತಸ್ಮೈ ಜಗತ್ ಪ್ರಥಿತಸುನ್ದರಪಾಣ್ಡ್ಯನಾಮ್ನೇ

ಹಾಲಾಸ್ಯಮಧ್ಯನಿಲಯಾಯ ನಮಃ ಶಿವಾಯ || ೮ ||

ಗೀರ್ವಾಣದೇಶಿಕಗಿರಾಮಪಿ ದೂರಗಂ ಯತ್

ವಕ್ತುಂ ಮಹತ್ವಮಿಹ ಕೋ ಭವತಃ ಪ್ರವೀಣಃ |

ಶಂಭೋ ಕ್ಷಮಸ್ವ ಭಗವಚ್ಚರಣಾರವಿನ್ದ-

ಭಕ್ತ್ಯಾ ಕೃತಾಂ ಸ್ತುತಿಮಿಮಾಂ ಮಮ ಸುನ್ದರೇಶ || ೯ ||