. ಕಮಲಾಪತ್ಯಷ್ಟಕಮ್

.  ಕಮಲಾಪತ್ಯಷ್ಟಕಮ್

        (ಸ್ವಾಮಿ ಬ್ರಹ್ಮಾನನ್ದಕೃತಮ್) 

ಭುಜಗತಲ್ಪಗತಂ ಘನಸುನ್ದರಂ ಗರುಡವಾಹನಮಮ್ಬುಜಲೋಚನಮ್ |

ನಲಿನಚಕ್ರಗದಾಕರಮವ್ಯಯಂ ಭಜತ ರೇ ಮನುಜಾಃ ಕಮಲಾಪತಿಮ್ || ೧ ||

    

ಅಲಿಕುಲಾಸಿತಕೋಮಲಕುನ್ತಲಂ ವಿಮಲಪೀತದುಕೂಲಮನೋಹರಮ್ |

ಜಲಧಿಜಾಙ್ಕಿತವಾಮಕಲೇವರಂ ಭಜತ ರೇ ಮನುಜಾಃ ಕಮಲಾಪತಿಮ್ || ೨ ||

ಕಿಮು ಜಪೈಶ್ಚ ತಪೋಭಿರುತಾಧ್ವರೈರಪಿ ಕಿಮುತ್ತಮತೀರ್ಥನಿಷೇವಣೈಃ |

ಕಿಮುತ ಶಾಸ್ತ್ರಕದಂಬವಿಲೋಕನೈಃ ಭಜತ ರೇ ಮನುಜಾಃ ಕಮಲಾಪತಿಮ್ || ೩ || 

ಮನುಜದೇಹಮಿಮಂ ಭುವಿ ದುರ್ಲಭಂ ಸಮಧಿಗಮ್ಯ ಸುರೈರಪಿ ವಾಞ್ಚ್ಛಿತಮ್ |

ವಿಷಯಲಂಪಟತಾಮಪಹಾಯ ವೈ ಭಜತ ರೇ ಮನುಜಾಃ ಕಮಲಾಪತಿಮ್ || ೪ ||     

ನ ವನಿತಾ ನ ಸುತೋ ನ ಸಹೋದರೋ ನ ಹಿ ಪಿತಾ ಜನನೀ ನ ಚ ಬಾನ್ಧವಾಃ |

ವ್ರಜತಿ ಸಾಕಮನೇನ ಜನೇನ ವೈ ಭಜತ ರೇ ಮನುಜಾಃ ಕಮಲಾಪತಿಮ್ || ೫ ||      

ಸಕಲಮೇವ ಚಲಂ ಸಚರಾಚರಂ ಜಗದಿದಂ ಸುತರಾಂ ಧನಯೌವನಮ್ |

ಸಮವಲೋಕ್ಯ ವಿವೇಕದೃಶಾ ದ್ರುತಂ ಭಜತ ರೇ ಮನುಜಾಃ ಕಮಲಾಪತಿಮ್ || ೬ ||  

ವಿವಿಧರೋಗಯುತಂ ಕ್ಷಣಭಙ್ಗುರಂ ಪರವಶಂ ನವಮಾರ್ಗಸಮಾಕುಲಮ್ |

ಪರಿನಿರೀಕ್ಷ್ಯ ಶರೀರಮಿದಮ್ ಸ್ವಕಂ ಭಜತ ರೇ ಮನುಜಾಃ ಕಮಲಾಪತಿಮ್ || ೭ ||  

ಮುನಿವರೈರನಿಶಂ ಹೃದಿ ಭಾವಿತಂ ಶಿವವಿರಿಞ್ಚಿಮಹೇನ್ದ್ರನುತಂ ಸದಾ |

ಮರಣಜನ್ಮಜರಾಭಯಮೋಚನಂ ಭಜತ ರೇ ಮನುಜಾಃ ಕಮಲಾಪತಿಮ್ || ೮ ||         

ಹರಿಪದಾಷ್ಟಕಮೇತದನುತ್ತಮಂ ಪರಮಹಂಸಜನೇನ ಸಮೀರಿತಮ್ |

ಪಠತಿ ಯಸ್ತು ಸಮಾಹಿತ ಚೇತಸಾ ವ್ರಜತಿ ವಿಷ್ಣುಪದಂ ಸ ನರೋ ಧ್ರುವಂ || ೯ ||