ಶ್ರೀ ಮಹಿಷಾಸುರಮರ್ದ್ದಿನೀಸ್ತೋತ್ರಮ್

ಶ್ರೀ ಮಹಿಷಾಸುರಮರ್ದ್ದಿನೀಸ್ತೋತ್ರಮ್

ಅಯಿಗಿರಿನನ್ದಿನಿ ನನ್ದಿತಮೇದಿನಿ ವಿಶ್ವವಿನೋದಿನಿ ನನ್ದನುತೇ

ಗಿರಿವರವಿನ್ಧ್ಯಶಿರೋಽಧಿನಿವಾಸಿನಿ ವಿಷ್ಣುವಿಲಾಸಿನಿ ಜಿಷ್ಣುನುತೇ |

ಭಗವತಿ ಹೇ ಶಿತಿಕಣ್ಠಕುಟುಮ್ಬಿನಿ ಭೂರಿಕುಟುಮ್ಬಿನಿ ಭೂರಿಕೃತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧ ||

ಸುರವರವರ್ಷಿಣಿ ದುರ್ಧರಧರ್ಷಿಣಿ ದುರ್ಮುಖಮರ್ಷಿಣಿ ಹರ್ಷರತೇ

ತ್ರಿಭುವನಪೋಷಿಣಿ ಶಂಕರತೋಷಿಣಿ ಕಿಲ್ಬಿಷಮೋಷಿಣಿ ಘೋಷರತೇ |

ದನುಜನಿರೋಷಿಣಿ ದಿತಿಸುತರೋಷಿಣಿ ದುರ್ಮದಶೋಷಿಣಿ ಸಿನ್ಧುಸುತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೨ ||

ಅಯಿ ಜಗದಮ್ಬ ಮದಮ್ಬ ಕದಮ್ಬವನಪ್ರಿಯವಾಸಿನಿ ಹಾಸರತೇ

ಶಿಖರಿಶಿರೋಮಣಿ ತುಙ್ಗಹಿಮಾಲಯಶೃಙ್ಗನಿಜಾಲಯಮಧ್ಯಗತೇ |

ಮಧುಮಧುರೇ ಮಧುಕೈಟಭಗಞ್ಜಿನಿ ಕೈಟಭಭಞ್ಜಿನಿ ರಾಸರತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೩ ||

ಅಯಿ ಶತಖಣ್ಡ ವಿಖಣ್ಡಿತ ರುಣ್ಡವಿತುಣ್ಡಿತ ಶುಣ್ಡಗಜಾಧಿಪತೇ

ರಿಪುಗಜಗಣ್ಡ ವಿದಾರಣ ಚಣ್ಡಪರಾಕ್ರಮ ಶುಣ್ಡಮೃಗಾಧಿಪತೇ |

ನಿಜಭುಜದಣ್ಡನಿಪಾತಿತ ಖಣ್ಡವಿಪಾತಿತ ಮುಣ್ಡಭಟಾಧಿಪತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೪ ||

ಅಯಿ ರಣದುರ್ಮದ ಶತ್ರುವಧೋದಿತ ದುರ್ಧರ ನಿರ್ಜ್ಜರ ಶಕ್ತಿಭೃತೇ

ಚತುರವಿಚಾರ ಧುರೀಣ ಮಹಾಶಿವ ದೂತಕೃತ ಪ್ರಮಥಾಧಿಪತೇ |

ದುರಿತ ದುರೀಹ ದುರಾಶಯ ದುರ್ಮತಿ ದಾನವದೂತಕೃತಾನ್ತಮತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೫ ||

ಅಯಿ ಶರಣಾಗತ ವೈರಿ ವಧೂವರ ವೀರವರಾಭಯದಾಯಕರೇ

ತ್ರಿಭುವನಮಸ್ತಕ ಶೂಲವಿರೋಧಿಶಿರೋಽಧಿಕೃತಾಮಲಶೂಲಕರೇ |

ಧುಮಿಧುಮಿತಾಮರ ದುನ್ದುಭಿನಾದ ಮಹೋ ಮುಖರೀಕೃತ ತಿಗ್ಮಕರೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೬ ||

ಅಯಿ ನಿಜಹುಙ್ಕೃತಿಮಾತ್ರನಿರಾಕೃತ ಧೂಮ್ರವಿಲೋಚನಧೂಮ್ರಶತೇ

ಸಮರವಿಶೋಷಿತಶೋಣಿತಬೀಜ ಸಮುದ್ಭವಶೋಣಿತ ಬೀಜಲತೇ |

ಶಿವ ಶಿವ ಶುಮ್ಭನಿಶುಮ್ಭ ಮಹಾಹವ ತರ್ಪಿತಭೂತಪಿಶಾಚರತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೭ ||

ಧನುರನುಸಂಗ ರಣಕ್ಷಣಸಂಗ ಪರಿಸ್ಫುರದಂಗ ನಟತ್ಕಟಕೇ

ಕನಕಪಿಶಙ್ಗಪೃಷತ್ಕನಿಷಙ್ಗ ರಸದ್ಭಟಶೃಙ್ಗ ಹತಾವಟುಕೇ |

ಕೃತಚತುರಙ್ಗ ಬಲಕ್ಷಿತಿರಙ್ಗ ಘಟದ್ಬಹುರಙ್ಗ ರಟದ್ಬಟುಕೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೮ ||

ಜಯ ಜಯ ಜಪ್ಯಜಯೇ ಜಯಶಬ್ದ ಪರಸ್ತುತಿತತ್ಪರ ವಿಶ್ವನುತೇ

ಭಣ ಭಣ ಭಞ್ಜಿಮಿ ಭಿಂಕೃತ ನೂಪರ ಶಿಞ್ಜಿತಮೋಹಿತ ಭೂತಪತೇ |

ನಟಿತನಟಾರ್ಧ ನಟೀನಟನಾಯಕ ನಾಟಿತನಾಟ್ಯ ಸುಗಾನರತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೯ ||

ಅಯಿ ಸುಮನಃ ಸುಮನಃ ಸುಮನಃ ಸುಮನೋಹರಕಾನ್ತಿಯುತೇ

ಶ್ರಿತರಜನೀ ರಜನೀ ರಜನೀ ರಜನೀಕರ ವಕ್ತ್ರವೃತೇ |

ಸುನಯನ ವಿಭ್ರಮರ ಭ್ರಮರ ಭ್ರಮರ ಭ್ರಮರ ಭ್ರಮರಾಧಿಪತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧೦ ||

ಸಹಿತಮಹಾಹವಮಲ್ಲಮತಲ್ಲಿಕ ಮಲ್ಲಿತರಲ್ಲಕ ಮಲ್ಲರತೇ

ವಿರಚಿತವಲ್ಲಿಕ ಪಲ್ಲಿಕ ಮಲ್ಲಿಕ ಭಿಲ್ಲಿಕ ಭಿಲ್ಲಿಕ ವರ್ಗವೃತೇ |

ಸಿತಕೃತಫುಲ್ಲಸಮುಲ್ಲಸಿತಾರುಣ ತಲ್ಲಜ ಪಲ್ಲವ ಸಲ್ಲಲಿತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧೧ ||

ಅವಿರಲಗಣ್ಡಗಲನ್ಮದ ಮೇದುರ ಮತ್ತಮತಙ್ಗಜ ರಾಜಪತೇ

ತ್ರಿಭುವನ ಭೂಷಣ ಭೂತಕಲಾನಿಧಿ ರೂಪಪಯೋನಿಧಿ ರಾಜಸುತೇ |

ಅಯಿ ಸುದತೀಜನ ಲಾಲಸಮಾನಸ ಮೋಹನ ಮನ್ಮಥ ರಾಜಸುತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧೨ ||

ಕಮಲದಲಾಮಲಕೋಮಲಕಾನ್ತಿಕಲಾಕಲಿತಾಮಲ ಫಾಲತಲೇ

ಸಕಲ ವಿಲಾಸ ಕಲಾನಿಲಯಕ್ರಮ ಕೇಲಿ ಚಲತ್ ಕಲಹಂಸಕುಲೇ |

ಅಲಿಕುಲಸಙ್ಕುಲಕುವಲಯಮಣ್ಡಲ ಮೌಲಿ ಮಿಲದ್ಬಕುಲಾಲಿಕುಲೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧೩ ||

ಕರಮುರಲೀರವ  ವೀಜಿತಕೂಜಿತ ಲಜ್ಜಿತಕೋಕಿಲಮಞ್ಜುಮತೇ

ಮಿಲಿತಪುಲಿನ್ದ ಮನೋಹರಗುಞ್ಜಿತ ರಂಜಿತ ಶೈಲನಿಕುಂಜಗತೇ |

ನಿಜಗಣಭೂತಮಹಾಶಬರೀಗಣ ಸದ್ಗುಣ ಸಂಭೃತ ಕೇಲಿತಲೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧೪ ||

ಕಟಿತಟಪೀತದುಕೂಲವಿಚಿತ್ರಮಯೂಖ ತಿರಸ್ಕೃತ ಚನ್ದ್ರರುಚೇ

ಪ್ರಣತ ಸುರಾಸುರ ಮೌಲಿಮಣಿಸ್ಫುರದಂಶುಲಸನ್ನಖಚನ್ದ್ರರುಚೇ |

ಜಿತಕನಕಾಚಲ ಮೌಲಿಪದೋರ್ಜಿತ ನಿರ್ಭರಕುಞ್ಜರಕುಂಭಕುಚೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧೫ ||

ವಿಜಿತಸಹಸ್ರಕರೈಕ ಸಹಸ್ರಕರೈಕ ಸಹಸ್ರಕರೈಕನುತೇ

ಕೃತಸುರತಾರಕ  ಸಂಗರತಾರಕ ಸಂಗರತಾರಕ ಸೂನುಸುತೇ |

ಸುರಥಸಮಾಧಿ ಸಮಾನಸಮಾಧಿ ಸಮಾಧಿ ಸಮಾಧಿ ಸುಜಾತರತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧೬ ||

ಪದಕಮಲಂ ಕರುಣಾನಿಲಯೇ ವರಿವಸ್ಯತಿ ಯೋಽನುದಿನಂ ಸ ಶಿವೇ

ಅಯಿ ಕಮಲೇ ಕಮಲಾನಿಲಯೇ ಕಮಲಾನಿಲಯಃ ಸ ಕಥಂ ನ ಭವೇತ್ |

ತವಪದಮೇವ ಪರಂಪದಮಿತ್ಯನುಶೀಲಯತೋ ಮಮ ಕಿಂ ನ ಶಿವೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧೭ ||

ಕನಕಲಸತ್ಕಲಸಿನ್ಧುಜಲೈರನುಸಿಞ್ಚಿನುತೇ ಗುಣರಙ್ಗಭುವಂ

ಭಜತಿ ಸ ಕಿಂ ನ ಶಚೀಕುಚಕುಮ್ಭ ತಟೀಪರಿರಮ್ಭಸುಖಾನುಭವಮ್ |

ತವ ಚರಣಂ ಶರಣಂ ಕರವಾಣಿ ನತಾಮರವಾಣಿ ನಿವಾಸಿ ಶಿವಂ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧೮ ||

ತವ ವಿಮಲೇನ್ದುಕುಲಂ ವದನೇನ್ದುಮಲಂ ಸಕಲಂ ನನು ಕೂಲಯತೇ

ಕಿಮು ಪುರುಹೂತಪುರೀನ್ದುಮುಖೀಸುಮುಖೀಭಿರಸೌ ವಿಮುಖೀಕ್ರಿಯತೇ |

ಮಮ ತು ಮತಂ ಶಿವನಾಮಧನೇ ಭವತೀ ಕ್ರುಪಯಾ ಕಿಮುತತ್ಕ್ರಿಯತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೧೯ ||

ಅಯಿ ಮಯಿ ದೀನದಯಾಲುತಯಾ ಕೃಪಯೈವ ತ್ವಯಾ ಭವಿತವ್ಯಮುಮೇ

ಅಯಿ ಜಗತೋ ಜನನೀ ಕೃಪಯಾಸಿ ಯಥಾಸಿ ತಥಾಽನುಮಿತಾಸಿರತೇ |

ಯದುಚಿತಮತ್ರ ಭವತ್ಯುರರೀಕುರುತಾದುರುತಾಪಮಪಾಕುರುತೇ

ಜಯ ಜಯ ಹೇ ಮಹಿಷಾಸುರಮರ್ದ್ದಿನಿ ರಮ್ಯಕಪರ್ದ್ದಿನಿ ಶೈಲಸುತೇ || ೨೦ ||