ಶ್ರೀ ಹರ್ಯಷ್ಟಕಮ್

ಶ್ರೀ ಹರ್ಯಷ್ಟಕಮ್

          (ಬ್ರಹ್ಮಾನನ್ದವಿರಚಿತಮ್)

 

ಜಗಜ್ಜಾಲಪಾಲಂ ಕನತ್ಕಣ್ಠಮಾಲಮ್

ಶರಚ್ಚನ್ದ್ರಫಾಲಂ ಮಹಾದೈತ್ಯಕಾಲಮ್ |

ತಮೋನೀಲಕಾಯಂ ದುರಾವಾರಮಾಯಮ್

ಸುಪದ್ಮಾಸಹಾಯಂ ಭಜೇಽಹಂ ಭಜೇಽಹಮ್ || ೧ ||

ಸದಾಂಭೋಧಿವಾಸಂ ಗಲೇ ಪುಷ್ಪಹಾಸಮ್

ಜಗತ್ಸನ್ನಿವಾಸಂ ಶತಾದಿತ್ಯಭಾಸಮ್ |

ಗದಾಚಕ್ರಹಸ್ತಂ ಲಸತ್ಪೀತವಸ್ತ್ರಮ್

ಹಸಚ್ಚಾರುವಕ್ತ್ರಂ ಭಜೇಽಹಂ ಭಜೇಽಹಮ್ || ೨ ||

ರಮಾಕಣ್ಠಹಾರಂ ಶ್ರುತಿವ್ರಾತಸಾರಮ್

ಜಲಾನ್ತರ್ವಿಹಾರಂ ಧರಾಭಾರಹಾರಮ್ |

ಚಿದಾನನ್ದರೂಪಂ ಮನೋಜ್ಞಸ್ವರೂಪಮ್

ಧೃತಾನೇಕರೂಪಂ ಭಜೇಽಹಂ ಭಜೇಽಹಮ್ || ೩ ||

ಜರಾಜನ್ಮಹೀನಂ ಪರಾನನ್ದಪೀನಮ್

ಸಮಾಧಾನಲೀನಂ ಸದೈವಾನವೀನಮ್ |

ಜಗಜ್ಜನ್ಮಹೇತುಂ ಸುರಾನೀಕಕೇತುಮ್

ತ್ರಿಲೋಕೈಕಸೇತುಂ ಭಜೇಽಹಂ ಭಜೇಽಹಮ್ || ೪ ||

ಕೃತಾಮ್ನಾಯಗಾನಂ ಖಗಾಧೀಶಯಾನಮ್

ವಿಮುಕ್ತೇರ್ನಿದಾನಂ ಹತಾರಾತಿಮಾನಮ್ |

ಸ್ವಭಕ್ತಾನುಕೂಲಂ ಜಗದ್ವೃಕ್ಷಮೂಲಮ್

ನಿರಸ್ತಾರ್ತಶೂಲಂ ಭಜೇಽಹಂ ಭಜೇಽಹಮ್ || ೫ ||

ಸಮಸ್ತಾಮರೇಶಂ ದ್ವಿರೇಫಾಭಕೇಶಮ್

ಜಗದ್ಬಿಮ್ಬಲೇಶಂ ಹೃದಾಕಾಶದೇಶಮ್ |

ಸದಾ ದಿವ್ಯದೇಹಂ ವಿಮುಕ್ತಾಖಿಲೇಹಮ್

ಸುವೈಕುಣ್ಠಗೇಹಂ ಭಜೇಽಹಂ ಭಜೇಽಹಮ್ || ೬ ||

ಸುರಾಲೀಬಲಿಷ್ಠಂ ತ್ರಿಲೋಕೀವರಿಷ್ಠಮ್

ಗುರೂಣಾಂ ಗರಿಷ್ಠಂ ಸ್ವರೂಪೈಕನಿಷ್ಠಮ್ |

ಸದಾ ಯುದ್ಧಧೀರಂ ಮಹಾವೀರಧೀರಮ್

ಭವಾಂಭೋಧಿತೀರಂ ಭಜೇಽಹಂ ಭಜೇಽಹಮ್ || ೭ ||

ರಮಾವಾಮಭಾಗಂ ತಲಾನಗ್ನನಾಗಮ್

ಕೃತಾಧೀನಯಾಗಂ ಗತಾರಾಗರಾಗಮ್ |

ಮುನೀನ್ದ್ರೈಸ್ಸುಗೀತಂ ಸುರೈಸ್ಸಂಪರೀತಮ್

ಗುಣೌಘೈರತೀತಂ ಭಜೇಽಹಂ ಭಜೇಽಹಮ್ || ೮ ||

ಇದಂ ಯಸ್ತು ನಿತ್ಯಂ ಸಮಾಧಾಯ ಚಿತ್ತಮ್

ಪಠೇದಷ್ಟಕಂ ಕಷ್ಟಹಾರಂ ಮುರಾರೇಃ |

ಸ ವಿಷ್ಣೋರ್ವಿಶೋಕಂ ಧ್ರುವಂ ಯಾತಿ ಲೋಕಮ್

ಜರಾಜನ್ಮಶೋಕಂ ಪುನರ್ವಿನ್ದತೇ ನೋ  || ೯ ||