ಶೀತಲಾಷ್ಟಕಮ್

ಶೀತಲಾಷ್ಟಕಮ್

         (ಸ್ಕಾನ್ದಪುರಾಣಾನ್ತರ್ಗತಮ್)

ವನ್ದೇಽಹಂ ಶೀತಲಾಂ ದೇವೀಂ ರಾಸಭಸ್ಥಾಂ ದಿಗಂಬರಾಮ್ |

ಮಾರ್ಜನೀಕಲಶೋಪೇತಾಂ ಶೂರ್ಪಾಲಙ್ಕೃತಮಸ್ತಕಾಮ್ || ೧ ||

ವನ್ದೇಽಹಂ ಶೀತಲಾಂ ದೇವೀಂ ಸರ್ವರೋಗಭಯಾಪಹಾಮ್ |

ಯಾಮಾಸಾದ್ಯ ನಿವರ್ತೇತ ವಿಸ್ಫೋಟಕಭಯಂ ಮಹತ್ || ೨ ||

ಶೀತಲೇ ಶೀತಲೇ ಚೇತಿ ಯೋ ಬ್ರೂಯಾದ್ದಾಹಪೀಡಿತಃ |

ವಿಸ್ಫೋಟಕಭಯಂ ಘೋರಂ ಕ್ಷಿಪ್ರಂ ತಸ್ಯ ಪ್ರಣಶ್ಯತಿ || ೩ ||

ಯಸ್ತ್ವಾಮುದಕಮಧ್ಯೇತು ಧ್ಯಾತ್ವಾ ಸಂಪೂಜಯೇನ್ನರಃ |

ವಿಸ್ಫೋಟಕಭಯಂ ಘೋರಂ ಗೃಹೇ ತಸ್ಯ ನ ಜಾಯತೇ || ೪ ||

ಶೀತಲೇ ಜ್ವರದಗ್ಧಸ್ಯ ಪೂತಿಗನ್ಧಯುತಸ್ಯ ಚ |

ಪ್ರಣಷ್ಟಚಕ್ಷುಷಃ ಪುಂಸಃ ತ್ವಾಮಾಹುರ್ಜೀವನೌಷಧಮ್ || ೫ ||

ಶೀತಲೇ ತನುಜಾನ್ ರೋಗಾನ್ ನೃಣಾಂ ಹರಸಿ ದುಸ್ತ್ಯಜಾನ್ |

ವಿಸ್ಫೋಟಕವಿದೀರ್ಣಾನಾಂ ತ್ವಮೇಕಾಮೃತವರ್ಷಿಣೀ || ೬ ||

ಗಲಗಣ್ಡಗ್ರಹಾ ರೋಗಾಃ ಯೇಚಾನ್ಯೇ ದಾರುಣಾ ನೃಣಾಮ್ |

ತ್ವದನುಧ್ಯಾನಮಾತ್ರೇಣ ಶೀತಲೇ ಯಾನ್ತಿ ಸಂಕ್ಷಯಮ್ || ೭ ||

ನ ಮನ್ತ್ರೋ ನೌಷಧಂ ತಸ್ಯ ಪಾಪರೋಗಸ್ಯ ವಿದ್ಯತೇ |

ತ್ವಾಮೇಕಾಂ ಶೀತಲೇ ಧಾತ್ರೀಂ ನಾನ್ಯಾಂ ಪಶ್ಯಾಮಿ ದೇವತಾಮ್ || ೮ ||

ಮೃಣಾಲತನ್ತುಸದೃಶೀಂ ನಾಭಿಹೃನ್ಮಧ್ಯಸಂಸ್ಥಿತಾಮ್ |

ಯಸ್ತ್ವಾಂ ಸಂಚಿನ್ತಯೇತ್ ದೇವಿ ತಸ್ಯ ಮೃತ್ಯುರ್ನ ಜಾಯತೇ || ೯ ||

ಅಷ್ಟಕಂ ಶೀತಲಾ ದೇವ್ಯಾಃ ಯೋ ನರಃ ಪ್ರಪಠೇತ್ ಸದಾ |

ವಿಸ್ಫೋಟಕಭಯಂ ಘೋರಂ ಗೃಹೇ ತಸ್ಯ ನ ಜಾಯತೇ || ೧೦ ||

ಶ್ರೋತವ್ಯಂ ಪಠಿತವ್ಯಂ ಚ ಶ್ರದ್ಧಾಭಕ್ತಿಸಮನ್ವಿತೈಃ |

ಉಪಸರ್ಗವಿನಾಶಾಯ ಪರಂ ಸ್ವಸ್ತ್ಯಯನಂ ಮಹತ್ || ೧೧ ||

ಶೀತಲೇ ತ್ವಂ ಜಗನ್ಮಾತಾ ಶೀತಲೇ ತ್ವಂ ಜಗತ್ಪಿತಾ |

ಶೀತಲೇ ತ್ವಂ ಜಗದ್ಧಾತ್ರೀ ಶೀತಲಾಯೈ ನಮೋನಮಃ || ೧೨||

ರಾಸಭೋ ಗರ್ದಭಶ್ಚೈವ ಖರೋ ವೈಶಾಖನನ್ದನಃ |

ಶೀತಲಾವಾಹನಶ್ಚೈವ ದೂರ್ವಾಕನ್ದನಿಕೃನ್ತನಃ || ೧೩ ||

ಏತಾನಿ ಖರನಾಮಾನಿ ಶೀತಲಾಗ್ರೇ ತು ಯಃ ಪಠೇತ್ |

ತಸ್ಯ ಗೇಹೇ ಶಿಶೂನಾಂ ಚ ಶೀತಲಾ ರುಙ್ ನ ಜಾಯತೇ || ೧೪ ||

               

ಶೀತಲಾಷ್ಟಕಮೇವೇದಂ ನ ದೇಯಂ ಯಸ್ಯ ಕಸ್ಯಚಿತ್ |

ದಾತವ್ಯಂ ಚ ಸದಾ ತಸ್ಮೈ ಶ್ರದ್ಧಾಭಕ್ತಿಯುತಾಯ ವೈ || ೧೫ ||