ಶ್ರೀದುರ್ಗಾಕವಚಮ್

ಶ್ರೀದುರ್ಗಾಕವಚಮ್

 

ಈಶ್ವರ ಉವಾಚ

ಶೃಣು ದೇವಿ ಪ್ರವಕ್ಷ್ಯಾಮಿ ಕವಚಂ ಸರ್ವಸಿದ್ಧಿದಮ್ |

ಪಠಿತ್ವಾ ಪಾಠಯಿತ್ವಾ ಚ ನರೋ ಮುಚ್ಯೇತ ಸಙ್ಕಟಾತ್ || ೧ ||

ಉಮಾ ದೇವೀ ಶಿರಃ ಪಾತು ಲಲಾಟಂ ಶೂಲಧಾರಿಣೀ |

ಚಕ್ಷುಷೀ ಖೇಚರೀ ಪಾತು ವದನಂ ಸರ್ವಧಾರಿಣೀ || ೨ ||

ಜಿಹ್ವಾಂ ಚ ಚಣ್ಡಿಕಾ ದೇವೀ  ಗ್ರೀವಾಂ ಸೌಭದ್ರಿಕಾ ತಥಾ |

ಅಶೋಕವಾಸಿನೀ ಚೇತೋ ದ್ವೌ ಬಾಹೂ ವಜ್ರಧಾರಿಣೀ || ೩ ||

ಹೃದಯಂ ಲಲಿತಾ ದೇವೀ ಉದರಂ ಸಿಂಹವಾಹಿನೀ |

ಕಟಿಂ ಭಗವತೀ ದೇವೀ ದ್ವಾವೂರೂ ವಿನ್ಧ್ಯವಾಸಿನೀ || ೪ ||

ಮಹಾಬಾಲಾ ಚ ಜಙ್ಘೇ ದ್ವೇ ಪಾದೌ ಭೂತಲವಾಸಿನೀ

ಏವಂ ಸ್ಥಿತಾಽಸಿ ದೇವಿ ತ್ವಂ ತ್ರೈಲೋಕ್ಯರಕ್ಷಣಾತ್ಮಿಕೇ |

ರಕ್ಷ ಮಾಂ ಸರ್ವಗಾತ್ರೇಷು ದುರ್ಗೇ ದೇವಿ ನಮೋಽಸ್ತು ತೇ || ೫ ||