ಶ್ರೀ ಕೃಷ್ಣಸ್ತೋತ್ರಮ್ (ವಿಪ್ರಪತ್ನೀಕೃತಮ್)

ಶ್ರೀ ಕೃಷ್ಣಸ್ತೋತ್ರಮ್ (ವಿಪ್ರಪತ್ನೀಕೃತಮ್)

ತ್ವಂ ಬ್ರಹ್ಮ ಪರಮಂ ಧಾಮ ನಿರೀಹೋ ನಿರಹಂಕೃತಿಃ |

ನಿರ್ಗುಣಶ್ಚ ನಿರಾಕಾರಃ ಸಾಕಾರಸ್ಸಗುಣಃ ಸ್ವಯಮ್ || ೧ ||

ಸಾಕ್ಷಿರೂಪಶ್ಚ ನಿರ್ಲಿಪ್ತಃ ಪರಮಾತ್ಮಾ ನಿರಾಕೃತಿಃ |

ಪ್ರಕೃತಿಃ ಪುರುಷಸ್ತ್ವಂ ಚ ಕಾರಣಂ ಚ ತಯೋಃ ಪರಮ್ || ೨ ||

ಸೃಷ್ಟಿಸ್ಥಿತ್ಯನ್ತವಿಷಯೇ ಯೇ ಚ ದೇವಾಸ್ತ್ರಯಃ ಸ್ಮೃತಾಃ |

ತೇ ತ್ವದಂಶಾಸ್ಸರ್ವಬೀಜಾಃ ಬ್ರಹ್ಮವಿಷ್ಣುಮಹೇಶ್ವರಾಃ || ೩ ||

ಯಸ್ಯ ಲೋಮ್ನಾಂ ಚ ವಿವರೇ ಚಾಖಿಲಂ ವಿಶ್ವಮೀಶ್ವರ |

ಮಹಾವಿರಾಣ್ ಮಹಾವಿಷ್ಣುಃ ತ್ವಂ ತಸ್ಯ ಜನಕೋ ವಿಭೋ || ೪ ||

ತೇಜಸ್ತ್ವಂ ಚಾಪಿ ತೇಜಸ್ವೀ ಜ್ಞಾನಂ ಜ್ಞಾನೀ ಚ ತತ್ಪರಃ |

ವೇದೇಽನಿರ್ವಚನೀಯಸ್ತ್ವಂ ಕಸ್ತ್ವಾಂ ಸ್ತೋತುಮಿಹೇಶ್ವರಃ || ೫ ||

ಮಹದಾದೇಸ್ಸೃಷ್ಟಿಸೂತ್ರಂ ಪಞ್ಚತನ್ಮಾತ್ರಮೇವ ಚ |

ಬೀಜಂ ತ್ವಂ ಸರ್ವಶಕ್ತೀನಾಂ ಸರ್ವಶಕ್ತಿಸ್ವರೂಪಕಃ || ೬ ||

ಸರ್ವಶಕ್ತೀಶ್ವರಃ ಸರ್ವಃ ಸರ್ವಶಕ್ತ್ಯಾಶ್ರಯಸ್ಸದಾ |

ತ್ವಮನೀಹಃ ಸ್ವಯಂಜ್ಯೋತಿಃ ಸರ್ವಾನನ್ದಸ್ಸನಾತನಃ || ೭ ||

ಅಹೋ ಆಕಾರಹೀನಸ್ತ್ವಂ ಸರ್ವವಿಗ್ರಹವಾನಪಿ |

ಸರ್ವೇನ್ದ್ರಿಯಾಣಾಂ ವಿಷಯಂ ಜಾನಾಸಿ ನೇನ್ದ್ರಿಯೀ ಭವಾನ್ || ೮ ||

ಸರಸ್ವತೀ ಜಡೀಭೂತಾ ಯತ್ಸ್ತೋತ್ರೇ ಯನ್ನಿರೂಪಣೇ |

ಜಡೀಭೂತೋ ಮಹೇಶಶ್ಚ ಶೇಷೋ ಧರ್ಮೋ ವಿಧಿಃ ಸ್ವಯಮ್ || ೯ ||

ಪಾರ್ವತೀ ಕಮಲಾ ರಾಧಾ ಸಾವಿತ್ರೀ ವೇದಸೂರಪಿ |

ವೇದಶ್ಚ ಜಡತಾಂ ಯಾತಿ ಕೋ ವಾ ಶಕ್ತಾ ವಿಪಶ್ಚಿತಃ || ೧೦ ||

ವಯಂ ಕಿಂ ಸ್ತವನಂ ಕುರ್ಮಃ ಸ್ತ್ರಿಯಃ ಪ್ರಾಣೇಶ್ವರೇಶ್ವರ |

ಪ್ರಸನ್ನೋ ಭವ ನೋ ದೇವ ದೀನಬನ್ಧೋ ಕೃಪಾಂ ಕುರು || ೧೧ ||

ವಿಪ್ರಪತ್ನೀಕೃತಂ ಸ್ತೋತ್ರಂ ಪೂಜಾಕಾಲೇ ಚ ಯಃ ಪಠೇತ್ |

ಸ ಗತಿಂ ವಿಪ್ರಪತ್ನೀನಾಂ ಲಭತೇ ನಾತ್ರ ಸಂಶಯಃ || ೧೨ ||