ಗಣನಾಯಕಾಷ್ಟಕಮ್
ಏಕದನ್ತಂ ಮಹಾಕಾಯಂ ತಪ್ತಕಾಂಚನಸನ್ನಿಭಮ್ |
ಲಂಬೋದರಂ ವಿಶಾಲಾಕ್ಷಂ ವನ್ದೇಽಹಂ ಗಣನಾಯಕಮ್ || ೧ ||
ಮೌಞ್ಜೀಕೃಷ್ಣಾಜಿನಧರಂ ನಾಗಯಜ್ಞೋಪವೀತಿನಮ್ |
ಬಾಲೇನ್ದುವಿಲಸನ್ಮೌಲಿಂ ವನ್ದೇಽಹಂ ಗಣನಾಯಕಮ್ || ೨ ||
ಅಮ್ಬಿಕಾಹೃದಯಾನನ್ದಂ ಮಾತೃಭಿಃ ಪರಿಪಾಲಿತಮ್ |
ಭಕ್ತಪ್ರಿಯಂ ಮದೋನ್ಮತ್ತಂ ವನ್ದೇಽಹಂ ಗಣನಾಯಕಮ್ || ೩ ||
ಚಿತ್ರರತ್ನವಿಚಿತ್ರಾಂಗಂ ಚಿತ್ರಮಾಲಾವಿಭೂಷಿತಮ್ |
ಚಿತ್ರರೂಪಧರಂ ದೇವಂ ವನ್ದೇಽಹಂ ಗಣನಾಯಕಮ್ || ೪ ||
ಗಜವಕ್ತ್ರಂ ಸುರಶ್ರೇಷ್ಠಂ ಕರ್ಣಚಾಮರಭೂಷಿತಮ್ |
ಪಾಶಾಂಕುಶಧರಂ ದೇವಂ ವನ್ದೇಽಹಂ ಗಣನಾಯಕಮ್ || ೫ ||
ಮೂಷಿಕೋತ್ತಮಮಾರುಹ್ಯ ದೇವಾಸುರಮಹಾಹವೇ |
ಯೋದ್ಧುಕಾಮಂ ಮಹಾವೀರ್ಯಂ ವನ್ದೇಽಹಂ ಗಣನಾಯಕಮ್ || ೬ ||
ಯಕ್ಷಕಿನ್ನರಗನ್ಧರ್ವ ಸಿದ್ಧವಿದ್ಯಾಧರೈಸ್ಸದಾ |
ಸ್ತೂಯಮಾನಂ ಮಹಾತ್ಮಾನಂ ವನ್ದೇಽಹಂ ಗಣನಾಯಕಮ್ || ೭ ||
ಸರ್ವವಿಘ್ನಕರಂ ದೇವಂ ಸರ್ವವಿಘ್ನವಿವರ್ಜಿತಮ್ |
ಸರ್ವಸಿದ್ಧಿಪ್ರದಾತಾರಂ ವನ್ದೇಽಹಂ ಗಣನಾಯಕಮ್ || ೮ ||
ಗಣಾಷ್ಟಕಮಿದಂ ಪುಣ್ಯಂ ಭಕ್ತಿತೋ ಯಃ ಪಠೇನ್ನರಃ |
ವಿಮುಕ್ತಸ್ಸರ್ವಪಾಪೇಭ್ಯೋ ರುದ್ರಲೋಕಂ ಸ ಗಚ್ಛತಿ || ೯ ||
No comments:
Post a Comment