ಶ್ರೀಶಾರದಾಭುಜಂಗಸ್ತೋತ್ರಂ

ಶ್ರೀಶಾರದಾಭುಜಂಗಸ್ತೋತ್ರಂ

    (ಶ್ರೀ ಶಂಕರಾಚಾರ್ಯಕೃತಂ)

ಸುವಕ್ಷೋಜಕುಮ್ಭಾಂ ಸುಧಾಪೂರ್ಣಕುಂಭಾಂ

ಪ್ರಸಾದಾವಲಮ್ಬಾಂ ಪ್ರಪುಣ್ಯಾವಲಂಬಾಮ್ |

ಸದಾಸ್ಯೇನ್ದುಬಿಮ್ಬಾಂ ಸದಾನೋಷ್ಠಬಿಮ್ಬಾಂ

ಭಜೇ ಶಾರದಾಮ್ಬಾಂ ಅಜಸ್ರಂ ಮದಮ್ಬಾಮ್ || ೧ ||

ಕಟಾಕ್ಷೇ ದಯಾರ್ದ್ರಾಂ ಕರೇ ಜ್ಞಾನಮುದ್ರಾಂ

ಕಲಾಭಿರ್ವಿನಿದ್ರಾಂ ಕಲಾಪೈಃ ಸುಭದ್ರಾಮ್ |

ಪುರಸ್ತ್ರೀಂ ವಿನಿದ್ರಾಂ ಪುರಸ್ತುಙ್ಗಭದ್ರಾಂ

ಭಜೇ ಶಾರದಾಮ್ಬಾಂ ಅಜಸ್ರಂ ಮದಮ್ಬಾಮ್ || ೨ ||

ಲಲಾಮಾಙ್ಕಫಾಲಾಂ ಲಸತ್ಗಾನಲೋಲಾಂ

ಸ್ವಭಕ್ತೈಕಪಾಲಾಂ ಯಶಃ ಶ್ರೀ ಕಪೋಲಾಮ್ |

ಕರೇತ್ವಕ್ಷಮಾಲಾಂ ಕನತ್ಪ್ರತ್ನಲೋಲಾಂ

ಭಜೇ ಶಾರದಾಮ್ಬಾಂ ಅಜಸ್ರಂ ಮದಮ್ಬಾಮ್ || ೩ ||

ಸುಸೀಮನ್ತವೇಣೀಂ ದೃಶಾನಿರ್ಜಿತೈಣೀಂ

ರಮತ್ ಕೀರವಾಣೀಂ ನಮತ್ ವಜ್ರಪಾಣೀಮ್ |

ಸುಧಾಮನ್ಥರಾಸ್ಯಾಂ ಮುದಾ ಚಿನ್ತ್ಯವೇಣೀಂ

ಭಜೇ ಶಾರದಾಮ್ಬಾಂ ಅಜಸ್ರಂ ಮದಮ್ಬಾಮ್ || ೪ ||

ಸುಶಾನ್ತಾಂ ಸುದೇಹಾಂ ದೃಗನ್ತೇ ಕಚಾನ್ತಾಂ

ಲಸತ್ ಸಲ್ಲತಾಙ್ಗೀಂ ಅನನ್ತಾಮಚಿನ್ತ್ಯಾಮ್ |

ಸ್ಮರೇತ್ತಾಪಸೈಃ ಸಙ್ಗಪೂರ್ವಸ್ಥಿತಾಂ ತಾಂ

ಭಜೇ ಶಾರದಾಮ್ಬಾಂ ಅಜಸ್ರಂ ಮದಮ್ಬಾಮ್ || ೫ ||

ಕುರಂಗೇ ತುರಂಗೇ ಮೃಗೇನ್ದ್ರೇ ಖಗೇನ್ದ್ರೇ

ಮರಾಲೇ ಮದೇಭೇ ಮಹೋಕ್ಷೇಽಧಿರೂಢಾಮ್ |

ಮಹತ್ಯಾಂ ನವಮ್ಯಾಂ ಸದಾ ಸಾಮರೂಪಾಂ

ಭಜೇ ಶಾರದಾಮ್ಬಾಂ ಅಜಸ್ರಂ ಮದಮ್ಬಾಮ್ || ೬ ||

ಜ್ವಲತ್ ಕಾನ್ತಿ ವಹ್ನಿಂ ಜಗನ್ಮೋಹನಾಙ್ಗೀಂ

ಭಜೇಮಾನಸಾಂಭೋಜ ಸುಭ್ರಾಂತಭೃಂಗೀಮ್ |

ನಿಜಸ್ತೋತ್ರಸಂಗೀತನೃತ್ಯಪ್ರಭಾಂಗೀಂ

ಭಜೇ ಶಾರದಾಮ್ಬಾಂ ಅಜಸ್ರಂ ಮದಮ್ಬಾಮ್ || ೭ ||

ಭವಾಂಭೋಜನೇತ್ರಾಜಸಂಪೂಜ್ಯಮಾನಾಂ

ಲಸನ್ಮನ್ದಹಾಸಪ್ರಭಾವಕ್ತ್ರಚಿಹ್ನಾಮ್ |

ಚಲಚ್ಚಂಚಲೋದಾರತಾಟಙ್ಕಕರ್ಣಾಂ

ಭಜೇ ಶಾರದಾಮ್ಬಾಂ ಅಜಸ್ರಂ ಮದಮ್ಬಾಮ್ || ೮ ||